HINDI sinipot ng mag-asawang Raymart Santiago at Claudine Barreto ang unang preliminary investigation na itinakda ng Pasay City Prosecutor’s Office kaninang alas-10:30 ng umaga.
Sa naturang imbestigasyon, didinggin ni Pasay City Assistant Prosecutor Manuel Loteyro ang kasong physical injuries at child abuse (Republic Act 7610), na isinampa ng showbiz couple laban kay veteran broadcaster/columnist Mon Tulfo.
Ang naturang mga kaso ay inihain ng mag-asawa laban kay Tulfo dahil sa nagkaroon umano ng pasa sa katawan si Claudine at nagka-trauma ang mga anak nito matapos ang naganap na kaguluhan sa Ninoy Aquino International Airport (NAIA) Terminal 3 noong May 6 ng taong kasalukuyan.
Tanging sumipot sa preliminary hearing si Mon Tulfo kasama ang mga abugado nito.
Ayon kay Asst. Prosec. Loteyro, wala siyang nakikitang problema sa di pagsipot ng mag-asawa dahil nagbigay lamang siya ng affidavit of reply kay Tulfo upang pasagutin sa loob ng pitong araw kaugnay sa mga kasong kinakaharap.



