NAPANGANGA ang sambayanang Pilipino kahapon nang ideklarang panalo si Timothy Bradley sa laban nito sa Pambansang Kamao na si Manny Pacquiao via split decision.
Halos umusok ang Twitter sa tindi ng mga reaksyon (dito sa ‘Pinas at maging sa ibang bansa) dahil sa resulta ng Pacquiao-Bradley match.
Halos nagkakaisa ang opinyon ng karamihan na LUTO ang naging desisyon ng judges at NINAKAWAN ng titulo (at championship belt) si Pacman.
Maraming nagulat, nadismaya, na-shock, napikon, nabuwisit, nairita at hindi makapaniwala sa local celebrities na tumutok sa laban.
Pero ano’t anuman ay nadeklara na ang panalo at ‘yun ay ang kalaban ni Pacquiao.
May mga napaisip kung bakit kung kailan napalapit sa Diyos si Manny ay saka ito nakalasap ng pait ng pagkatalo.






